आज पनि संसद बैठक अवरुद्ध

80

एनपिएल न्युज २२ बैशाख, काठमाडौं : नेकपा एमालेका अगुवाईमा विपक्षी दलका सांसदहरुले व्यवस्थापिका संसद बैठक अवरुद्ध पारेका छन् । शुक्रबार दोस्रो पटक बसेको संसद बैठकमा प्रधानन्यायाधीश सुशीला कार्कीविरुद्ध दर्ता भएको महाअभियोग प्रस्तावमाथि छलफल गर्ने कार्यसूची थियो ।

बैठक सुरु भए लगतै एमाले सांसदहरु उठेर विरोध गरे तर, सभामुखले महाअभियोग प्रस्तावका प्रस्ताव मीन विश्वकर्मालाई प्रस्ताव पेश गर्न समय दिइन् । कांग्रेस सांसद मीन विश्वकर्मा अघि बढ्न खोजेका थिए तर, विपक्षी सांसदहरुले उनलाई रोके ।प्रस्तावक नै रोष्टममा जान नपाएपछि सभामुख ओनसरी घर्ती मगरले विपक्षीलाई आसन ग्रहण गर्न आग्रह गरिन् ।विपक्षी सांसदहरुको लगातारको नाराबाजीपछि संसद बैठक आइतबारसम्मका लागि स्थगित भएको छ । यसअघि शुक्रबारको पहिलो बैठकमा एमालेको नाराबाजीबीच महाअभियोग प्रस्तावमाथि छलफल गर्ने समय तोकिएको थियो । कार्यशैली स्वेच्छाचारी काम गरेको भन्दै सत्तारुढ नेपाली कांग्रेस र नेकपा माओवादी केन्द्रका सांसदहरुले प्रधानन्यायाधीश सुशीला कार्कीबिरुद्ध बैशाख १७ गते संसदमा महाअभियोग दर्ता गराएका थिए ।

आफ्नो विचार ब्यक्त गर्नुहोस..
Loading...